တစ်ခါလာလည်း ဒါပဲ
...
အပ်ကြောင်းထပ်နေတဲ့
ဒိုင်ယာလော့ဂ်နဲ့
ငြီးငွေ့စိတ်ပျက်ဖွယ်
အကြောင်းအရာနဲ့ ...
အဖြစ်အပျက်တိုင်းမှာ
ခင်ဗျားပဲ ဇာတ်လိုက်ဖြစ်နေတယ် ...
ကျွန်တော်တို့ရဲ့
လတ်ဆတ်တဲ့ အတွေးအခေါ်တွေကို
ပုပ်သိုးညှီစို့သွားအောင်လုပ်ဖို့လည်း
ခင်ဗျားပဲ တတ်နိုင်တယ်
...
မသေရုံတမည် ဝေါဟာရတွေနဲ့
အသက်ဝင်လှပနေတဲ့ ခင်ဗျားရဲ့နေ့စဉ်မှတ်တမ်းမှာ
ကျေးဇူးပြုပြီး ကျွန်တော်တို့
နာမည်တွေထည့်မရေးပါနဲ့ ...
ကျွန်တော်တို့က ဒီနေ့အတွက်
အသက်ရှင်တယ် ...
ခင်ဗျား မနေ့ကမှာ
အိပ်စက်နေခဲ့တယ် ...
ကျွန်တော်တို့က အရှိတရားကို
လက်ဗလာနဲ့ ကြိုဆိုတယ်
ခင်ဗျားက အသိတရားကို
လက်ခါပြီး မောင်းထုတ်တယ် ...
ကျွန်တော်တို့က ရှေ့တစ်လှမ်းတိုးဖို့
နောက်တစ်လှမ်းဆုတ်ချိန်မှာ
ခင်ဗျားက နောက်တစ်လှမ်းဆုတ်ပြီး
ရှေ့နှစ်လှမ်းစာလောက် ခုန်ကျော်ပစ်လိုက်တယ် ...
တကယ်တော့ ခင်ဗျားသိပ်တော်ပါတယ်
...
လူတွေအပေါ်တိတ်တိတ်ခလေး
ဂုတ်ခွစီးတဲ့နေရာမှာ ...
မမြင်အပ်တဲ့ သတ္တ၀ါတွေတောင်
ခင်ဗျားကို မမီဘူး ....
ခုရေတွင်းတူးပြီး
ခုရေကြည်သောက်နိုင်တဲ့လူဟာ
ဟောဒီ့လောကမှာ ခင်ဗျားတစ်ယောက်ထဲရှိပါတယ်
...
ဒါပေမယ့် ...
ဝမ်းနည်းစရာတစ်ခုက
ခင်ဗျားဘ၀ရဲ့ အရေးအကြီးဆုံးကာလတွေမှာ
ခင်ဗျားနောက်မှာ ခင်ဗျားအရိပ်တောင်ကပ်မပါနိုင်အောင်
ငါစွဲကြီးခဲ့တာတော့
ကျွန်တော်တို့အားလုံး
တကယ်ပဲအံ့သြမိပါရဲ့ ....။
..............................................................
စိုးသူရ
No comments:
Post a Comment